Pasakaan sang kaso nga double murder kag attempted murder ang suspek sa pagpangluthang sa Barangay Sto. Rosario-Duran City Proper sang Oktubre 25.
Ang suspek ang ginkilala kay Anthony Sta. Lucia, 36-anyos.
Samtang, ang biktima amo sanday, Conrad Gabo, 36-anyos, kag Angelito Tobinasa, 35-anyos, residente sang Barangay Osorio 2, San Remigio, Antique.
Sa interview sang Bombo Radyo kay Police Captain Melchor Tolentino, hepe sang Iloilo City Police Office 1, iya ginpahayag nga nagapadayon ang pagproseso sang mga papeles agud mapasaka ang nasambit nga mga kaso batuk sa suspek.
Suno kay PCapt. Tolentino, tubtob subong wala sa gihapon na-recover ang armas nga gingamit sang suspek bangud santo sa pahayag sang suspek ginhaboy sini sa kahilamunan ang iya nga armas.
Apang, sang ginkadtuan sang kapulisan ang lugar, wala sang may nakita nga armas.
Pahayag pa niya, base sa imbestigasyon sang kapulisan, nagpauli pa ang suspek sa iya balay matapos gihimo ang krimen antes ini nga nagkadto sa abandonado nga balay kun sa diin ini na-corner kag naaresto sang mga pulis.
Nahibaluan nga base sa imbestigasyon sang mga otoridad, nakaangkon sang igo sang bala sa likod kag ulo ang biktima nga amo si Gabo nga gintunaan sang iya kamatayon.
Samtang, ang ika-duha nga biktima nga amo si Tobinasa nga malapit sa lugar kag nagabakal lamang sang fishball ang nasalabat sang bala nga nag-igo sa iya ilok nga gintunaan man sang iya nga kamatayon.
Ginpahayag pa ni PCapt. Tolentino nga base sa panaysayon sang suspek, pasado alas-dos sang kaagahon, Oktubre 25, naggwa ini agud sugaton ang iya bata kag sang papuli na, nakita niya nga ginasundan sya sang duha ka indibidwal rason nga pag-abot niya sa iya balay, ginkuha niya ang iya armas kag gintiro ang ginapahayag nga nagasunod sa iya.
Apang, gindugang sang hepe nga ang panaysayon sang suspek ang wala nagasanto sa ila imbestigasyon rason dako ang posibilidad nga nagabutig lamang ini.
