Ginbasura sang Fourth Division sang Sandiganbayan ang kaso nga ginpasaka batok sa tatlo ka mga anay opisyal sang Roxas, Capiz.
Lakip sa mga napasakaan sang reklamo amo sanday, Former Capiz Governor Esteban Evan B. Contreras, Former Capiz Administrator Edwin C. Monares, kag Former Roxas Memorial Provincial Hospital (RMPH) OIC Dr. Edmarie Tormon.
Sa interview sang Bombo Radyo kay Atty. Kaiser Cordero, CEO kag founding partner sang Cordero and Associates, ginpahayag sini nga nabaton na nila ang desisyon sang Sandiganbayan kahapon nga nagadeklarar sang pagbasura sang kaso batok sa ila mga kliyente.
Suno kay Atty. Cordero, una na sila nga nagpasa sang Motion to Dismiss base sa rason nga insufficient prosecution evidence.
Ginpabutyag pa niya nga isa sa mga rason sang dismissal amo ang kapaslawan sang Prosecution nga mapamatud-an “beyond reasonable doubt” ang mga alegasyon.
Ginpaburan sang korte ang “Demurrers to Evidence” nga gin-file sang mga akusado.
Sa pihak sang ini nga kadalag-an, ginpahayag ni Contreras nga halos tatlo man ka tuig ila pakigbato sa pagdepensa sang ila kliyente.
Matandaan nga ginpasakaan sang reklamo ang nasambit nga mga akusado sang Sangguniang Panlalawigan sang Capiz nga gin-representar sang pila ka mga opisyales sang nasambit nga lugar sadtong Nobyembre 24, 2021 bangud sa ginaalegar bayolasyon sang Republic Act 3019 ukon Anti-Graft and Corrupt Practices Act; Republic Act 9184 ukon Government Procurement Reform Act; kag Malversation of Public Funds or Property sandig sa Revised Penal Code.
May kahilabtanan ini sa natukiban sang Sanggunian sa ila committee hearings natuhoy sa request ni Contreras nga supplemental appropriation sang pondo nga nagabalor sang masobra P79 million kag pagbakal sang masobra P5 million, kag P1,499,000 nga medical supplies sa NGB Marketing gamit ang Small Value Procurement (SVP).
