𝗢𝗧𝗢𝗡, 𝗜𝗟𝗢𝗜𝗟𝗢 —Ginalantaw nga mapasaka na subong nga adlaw ang kaso nga homicide batok sa pulis nga nagluthang-patay sa iya nga abyan sa Brgy. Sta. Rita, Oton, Iloilo.
Ang suspek amo si Patrolman Mike Tagacay, legal ang edad, kasado, residente sang nasambit nga barangay kag assigned sa Oton Municipal Police Station.
Ang biktima naman amo si Maria Librias Billones, 50, residente man sang nasambit nga lugar.
Sa interview sang Bombo Radyo kay Police Lieutenant Colonel Abner Jordan, hepe sang Oton Municipal Police Station, iya gin-athag kon ngaa homicide ang kaso, bangud suod nga mag-abyan ang duha kag nagaguwa nga indi target sang pulis nga tirohon ukon patyon ang biktima.
Suno kay Jordan, ginalantaw man nga posible self defense ang gin-ubra sang pulis bangud nakita sini nga naghana bukas ang biktima sang iya nga bag agud nga magkuha sang armas, rason man nga gin-unahan na lang tiro sang suspek pulis agud nga makapangaman.
Ginpahayag man sini nga may assignment ang suspek nga pulis nga i-monitor ang isa ka drug personality sa amo man nga lugar kag indi kabahin ang biktima sa assignment sang pulis.
Gin-athag man sang kapulisan nga indi mahambal nga konektado ang biktima sa iligal nga druga bangud tinlo ang records sini sa ila nga talatapan.
Nahibaluan nga masami nga yara sa tyangge ang biktima kag ang suspek nga naga-inom-inom, apang sa amo nga tion, wala sila nga duha nag-intindihanay rason man nga ini nagresulta sa pagpangluthang.
