Ginapreparar na sang katapo sang Philippine National Police (PNP) ang pagpasaka sang kaso nga murder sa suspek nga nagbuno patay sa iya live in partner sa Sitio Balagon, Brgy. Badiang, Anilao, Iloilo.
Ang biktima amo si Marlyn Powden, 31, samtang ang suspek naman amo si Federico Soliz, 49 kag lunsay residente sang amo nga lugar.
Lunsay myembro sang Ati Community ang duha.
Sa interview sang Bombo Radyo kay Police Staff Sergeant Jonar Ortiz, imbestigador sang Anilao Municipal Police Station, iya ginpahayag nga ginahulat na lang nila ang death certificate agud nga mahitso ang pagpasaka sang kaso.
Suno kay Ortiz, nagpahayag ang pamilya nga matapos ang lubong sang ila himata kag ila i-proseso ang death certificate sini bangud sa iya pagpositibo sa COVID-19.
Narecover naman sang mga otoridad ang cellphone nga amo ang ginhalinan sang away sang mag live in partner tubtob nga naglab-ot sa pagpangbuno patay.
Apang, suno sa natungdan indi nila mabukad ang cellphone bangud guba ini.
Nahibaluan nga selos ang ginalantaw nga motibo sa pagkomiter sang krimen.
