Kaso nga murder ang pagatubangon sang retired coast guard nga nagtiro-patay sa isa ka barbero sa Zone 6, Barangay Calumpang, Molo, Iloilo City.
Ang biktima amo si Bryan Gabuelo, 41-anyos; ang suspek naman amo si Noel Amboy, 66-anyos, lunsay residente sang nasambit nga lugar.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga nahulog sa murder ang kaso sang suspek bangud lakip sa ila ginalantaw amo ang resulta sang medication sang biktima.
Suno kay Inot, may ground sila nga ginakaptan bangud may ‘intent to kill’ ang suspek batok sa biktima paagi man sa agresibo nga pagsulod sini sa balay sang biktima.
Gin-athag man sang natungdan nga ginatun-an sang ila talatapan kon nalapas sang suspek ang election gun ban sang Commission on Elections (COMELEC) bangud natabo ang insidente sa sulod sang balay.
Nahibaluan nga gindekalarar sang attending physician nga patay ang biktima kahapon nga adlaw apisar nga ginlapatan ini sang pagbulong.
Kon balikan, ginluthang sang suspek sa ulo kag sa lawas gamit ang .45 caliber nga armas nga amo ang gintunaan sang iya kamatayon.
Boluntaryo naman nga nagsungka ang suspek sa mga pulis kag gin-surrender sini ang iya armas kag isa ka empty shell sang .45 caliber.
