Natalana nga ipasaka na ang kaso batok sa suspek nga nagpatay sa isa ka barangay official sa Brgy. San Rafael, Tigbauan, sa tunga sang paglaslas sang bagyo Kristine.
Ang biktima amo si Jobanie T. Triste, 52, anay punong barangay kag nagapungko bilang barangay kagawad.
Samtang ang suspek amo si John Castro Jr.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga kaso nga murder ang ipasaka batok kay Castro.
Suno kay Mansoy, ang asawa sang biktima amo ang nagserbe complainant.
Sa subong pahayag sang hepe, halos kompleto na ang mga kinahanglan nga dokumento sa pagpasaka sang kaso kag may ginahulat na lang nga resulta sang forensic examination sang mga recoveries.
Naggwa naman sa imbestigasyon nga posible konektado ang suspek sa isa ka maimpluwensiya nga tawo.
Nahibaluan nga pila ka beses na nga ginpapreso si Castro apang madasig man nga makagwa.
Masami man ini nga may ginasukbit nga armas kag nagapalupok sa ila lugar.
