Pasakaan sang kaso nga murder ang suspek sa pagpangbuno kag pagpangtiro-patay kay Elmer Bais Simbahon, nga nasapwan nga wala na sang kabuhi sa talamnan sa Brgy. Bolilao, Dumangas, Iloilo sang Abril 21.
Sa interview sang Bombo Radyo kay Police Senior Master Sergeant Efren Gonzaga Jr., imbestigador sang Dumangas Municipal Police Station, iya ginpahayag nga may yara na sila sang witness nga nakahatag na sang affidavit bilang kabahin sang ila imbestigasyon.
Suno kay Gonzaga, nag-request na man sila sa National Bureau of Investigation (NBI) sang autopsy examination sa biktima.
Ginakonsiderar sang kapulisan nga ang “person of interest” nga ila ginasundan ang positibo nga amo sadto ang may kahimuan sa krimen.
Suno sa kapulisan, ginkilala ang suspek kay alyas Darwin, residente sang amo man nga barangay, legal ang edad, kag wala sang permanente nga obra.
Nahibaluan nga ang biktima nga si Simbahon ang nasapwan nga may ara na sang pilas sa magtimbang sini nga paa, alatrasan, dalom sang nawala sini nga mata, kag kilid sang baba.
