𝗜𝗟𝗢𝗜𝗟𝗢 𝗖𝗜𝗧𝗬 – Napasaka na ang kaso nga murder batok sa mga suspek nga nagluthang-patay sa 18-anyos nga lalaki sa MH Del Pilar Street, Barangay Taal, Molo, Iloilo City.
Ang biktima amo si John Chris Mark Gapol, residente sang Barangay Calumpang, Molo, Iloilo City.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga lakip sa mga ginpasakaan sang kaso ang duha ka mga John Does ukon ang riding in tandem suspects nga wala pa sang pangalan.
Magluwas diri, ginpasakaan man sang kaso sanday Ryan Kent ‘RK’ Magbanua, 25 kag alias Makoy,16, sa diin nagserbe ang mga ini nga principal accessories sa krimen.
Suno kay Inot, nagwa man sa ila imbestigasyon nga si Magbanua ang nagsugo nga patyon si Gapol.
Ginpahayag sini nga nakita mismo sang witness nga nagabais ang biktima kag si Magbanua sang yara pa lang ang mga ini sa Barangay Calumpang, Molo, Iloilo City.
Samtang, si alias Makoy naman ang kaupod sang biktima sa tricycle, apang makaduluda nga naglumpat ini kag nagdalagan antes pa ginpatay si Gapol nga nagapakita nga may ideya ini nga patyon ang biktima.
Sa subong, padayon pa nga ginapangita ang riding in tandem suspects, samtang preso naman si Gapol sa kag nagapabilin naman si alias Makoy sa Dalayunan: A Home for Boys sa Lapuz, Iloilo City.
