ILOILO CITY – Ginpatpat sang isa ka Bombo Abogado ang nagkalain-lain nga sahi sang pagpangawat.
Nahibaluan nga madamo sang na-record nga kinawatay sa syudad kag probinsya sang Iloilo sa ulihi nga bahin sang tuig 2022.
Sa interview sang Bombo Radyo kay Atty. Alfredo Arungayan III, iya ginpahayag nga ang pagpangawat ang isa ka akto kun sa diin, ginakuha ang bagay nga wala sang pahanugot sang tag-iya.
Suno pa sa natungdan, duha ka mga kaso kriminal ang mahimo nga mapasaka.
Ini amo ang robbery kag theft.
Ang robbery amo ang pagkuha sang bagay nga naggamit sang pwersa, pamahog kag gamo samtang ang theft naman amo ang pagkuha sang bagay nga wala sang ano man nga pagpamilit.
Nagpaandam naman si Atty. Arungayan nga mangin vigilante sa tanan nga tion ilabi pa subong nga madamo sang opurtunidad nga nakita ang mga kawatan.
