Ginahanda na sang mga otoridad ang kaso nga parricide batok sa amay nga naglabo patay sa iya kaugalingon nga anak sa Sitio Liningwan, Barangay Maabay, Sibunag, Guimaras.
Ang biktima amo si Edwin Galimba, 60 kag ang suspek naman nga amay amo si Sergio Galimba, 84.
Sa interview sang Bombo Radyo kay Police Lt. Val Cambel, hepe sang Sibunag Municipal Police Station, iya ginpahayag nga masami magtuga sang gamo ang biktima kun ini ang nakainom.
Suno kay Cambel, gintuyo ni Edwin nga labuon ang iya amay matapos nga nagbaisay bangud sa pagtapungol sang anak sa iya nga iloy.
Nakalikaw ang amay kag wala ini naigo.
Nagbalos naman ang amay kag ginlabo ang iya anak sa diin naigu ini sa ulo kag liog nga amo ang gintunaan sang iya kamatayon.
Depensa sang amay, posible nga ang iloy ni Edwin ukon siya ang matam-an kun indi niya paglabuon ang iya anak.
Nahibaluan nga antes ginbawian sang kabuhi, naghingyo pa ang anak sa iya amay nga dal-on ini sa ospital.
Sa subong, preso sa Sibunag Municipal Police Station ang amay.
