ILOILO CITY – Ginbasura sang Office of the Ombudsman ang direct kag indirect bribery charges batuk kay former Senator Leila de Lima, sa iya anay bodyguard nga si Ronnie Dayan bangud sang kakulang sang ebidensya.
Sa siyam ka pahina nga resolution, ginpahayag sang Ombudsman nga may yara sang pagsalangisag sa mga testimoniya nanday self-confessed drug lord Kerwin Espinosa, Ram-Jhon Michael Espinosa kag Marcelo Adorco sa kun paano ginhatag ang suhol kag ang meeting kuntani kay De Lima sa Baguio City.
Bangud sini, nakita nga wala sang probable cause agud nga ma-indict ang mga respondents sang kaso nga gin-file batuk sa ila.
Ang kaso ang nag-ugat sa gina-alegar nga pag-upod nanday De Lima kag Dayan agud nga mag-extort sang kabaylo sang kaso ni Espinosa may kaangtanan sa iligal nga droga.
Kung madumduman, sang ginpatigayon nga Senate hearings sang 2016, nag-testify si Espinosa nga nangin kabahin sang illegal drug trade si de Lima sa sulod sang New Bilibid Prison sang siya ang Justice Secretary sa idalom sang administrasyon ni late President Benigno “Noynoy” Aquino III.
Gin-akusaran man sini si de Lima nga nagbaton sang P8 million nagikan sa iya para sa senatorial campaign pinaagi kay Dayan.
Apang sang Abril, ginbawi ni Espinosa ang akusasyon batuk kay de Lima kag sa iya counter-affidavit, ginpahayag sini nga siya ang ginpilit, gin-pressure, gin-intimidate kag ginpahug sang pulis agud nga maghimo sang iya una nga pahayag.
Sa apat ka pahina nga counter-affidavit, ginpahayag ni Adorco nga ginpilit siya nga pirmahan ang affidavit sa kahadlok nga mabutang sa alang-alang ang iya kabuhi samtang yara sa Albuera Police Station sang 2016.
Suno sa iya, ang affidavit ang ginhimo sang isa ka pulis sa Albuera Police Station sa mandu ni Police Chief Inspector Jovie Espenido.
Ang affidavit ang ginhimo matapos nga nadakpan ini kag ang iya mga kaupod sa isa ka buy-bust operation sang July 2016.
Ginkatingala man sang Ombudsman kun ngaa nga mahatag sang P8 million Espinosa apisar nga wala niya nakita si de Lima.
Si de Lima ang preso sa PNP Headquarters sa Camp Crame bangud sang mga akusasyon may kaangtanan sa iligal nga droga nga gintawag niya nga “political persecution” ni Presidente Rodrigo Duterte.
