ILOILO CITY – Wala pa sang development sa kaso sang ginatudlo nga remnant sang Prevendido Drug Group nga ginluthang-patay sang riding in tandem sa Brgy. Rizal Lapuz Sur, Iloilo City.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ginakabig nga high value target ang drug personality nga si Roy Guco, 42, kag isa ka ex-convict.
Suno kay Malong, si Guco ang napreso sang Oktubre 6, 2016 paagi sa buy bust operation kag nakaguwa sang Agosto 13, 2019 bangud sa plea bargaining.
Ginpahayag ni Malong nga bisan illegal drugs ang mabaskog nga motibo sa krimen apang indi pa ini mapat-od sang otoridad bangud nga wala makilala ang mga suspek.
Ang maathag lang suno kay Malong amo nga indi pulis ang sa likod sang pagpatay kay Guco.
Nagahingyo man sang bulig sang publiko ang Police Regional Office 6 agud nga masolbar ang kaso sa pagpatay sa nasambit nga drug personality.
