Padayon nga nagasaka ang kaso sang COVID-19 sa Pilipinas.
Sa pinakabag-o nga data nga ginpagwa sang Department of Health, naglab-ot na sa 707 ang total number of cases sang positibo nga kaso sang COVID-19 sa pungsod matapos nga nadugangan ini sang 71 pa.
Suno kay Department of Health Secretary Francisco Duque, nagdangat na sa 45 ang kabilugan nga numero sang napatay bangud nagdugang diri ang pito ka panibag-o nga death case.
Sa diin, lima diri ang lalaki samtang duha naman ang babayi.
Sa pito nga nagdugang, anum ang wala sang travel history kag exposure sa nagpositibo sa COVID-19.
Pinakatigulang sa ila nga grupo si PH600 nga isa ka 87-anyos nga lalaki nagikan sa Sultan Kuldarat; kag PH354 nga isa ka 80 anyos nga babayi gikan sa Rizal.
Pila pa sa mga napatay amo sanday PH278 nga isa ka 72-anyos nga babayi gikan sa Rizal; PH540 nga 50-anyos nga lalaki gikan sa Pasig City; PH636 nga 56-anyos nga lalaki gikan sa Pampanga; PH327 nga 46-anyos gikan sa Laguna kag PH321 nga 46-anyos nga lalaki gikan sa Rizal.
Samtang duha pa ka pasyente ang nagdugang sa mga nakarecover nga 28 na ang kabilugan nga numero.
Base sa data sang DOH, na-discharge naman sanday PH112 kag PH28 apisar isa lang ka bes nga nag test nga negative bangud nangin asymptomatic.
