Nag-ugat sa duha ka empleyado ang paglatnanay sang COVID-19 sa Department of Tourism (DOT) Region VI.
Sa interview sang Bombo Radyo kay Christine Mansinares, Regional Director sang DOT VI, iya ginpahayag nga nakitaan sang sintomas sang COVID-19 ang duha ka empleyado sa diin matapos ginpaidalom sa reverse transcription polymerase chain reaction (RT-PCR) test, nagwa nga postibo ang mga ini sa virus.
Suno kay Mansinares, matapos sini, gilayon sila nga nagpatigayon man sang swab test sa tanan nga personnel sang opisina kag sa subong, nagsaka na sa 13 ang numero sang mga nagpositibo sa COVID-19 sa diin duha diri ang symptomatic.
Ginpaidalom na sa istrikto nga quarantine ang mga nagpositibo sa virus sa diin ang iban sa ila ang residente sang Guimaras, Iloilo Province kag may yara man sang taga syudad sang Iloilo.
Dugang pa ni Mansinares, sa ila 32 tanan ka empleyado, 20 na diri ang fully vaccinated batok sa COVID-19.
Nagapangayo man sang paghangop ang natungdan sa publiko sa diin sirado pa sa gihapon ang ila nga opisina ‘until further notice’ apang aktibo man sila via online sa diin naka-work from home ang pila nila ka mga empleyado.
