Masobra 33,000 na ang kaso sang Coronavirus Disease 2019 (COVID-19) sa Pilipinas sa diin 778 ka mga infected ang nagdugang.
Sa 778, 415 diri ang “fresh” ukon newly validated kag 363 naman ang reported late sa diin kabug-osan nga 33,069 ang numero sang mga nagpositibo sa COVID-19.
Nagdugang sang 255 ka mga pasyente ang naka recover sa diin 8,910 na ang pangkabug-osan samtang 1,212 naman ang patay sa diin walo ang nagdugang.
Ini na ang ika 15 ka asud-asud nga adlaw nga may yara sang kapin 200 ka mga naka recover.
Sa fresh cases, 250 ang halin sa Metro Manila, 72 sa Region VII kag 93 naman ang naghalin sa iban nga rehiyon sa pungsod.
Sa late cases, 202 ang halin sa Metro Manila, 34 sa Region VII kag 127 naman nga mga pasyente ang naghalin sa iban nga bahin sang pungsod.
May yara sa gihapon sang 22,463 active cases nga ginapa-idalom na sa pagbulong kag quarantine — 21,543 ang may mid symptoms, 752 ang asymptomatic, 117 ang severe kag 24 naman ang yara sa kritikal nga kondisyon.
Suno kay Department of Health Undersecretary Mari Rosario Vergeire, ang padayon nga pagtaas sang kaso ang mahimo nga tuga sang testing capacity kag pagpahalog sa community restriction.
Samtang sa bug-os nga kalibutan, 9,630,625 ang kaso sang COVID-19; 487,473 ang patay kag 5,232,083 naman ang naka-recover.
