ILOILO CITY – Ginmando sang COVID-19 Team sang Iloilo City Government ang pagpauntat sang mass gatherings sa syudad sang Iloilo.
Ini ang kasunod sang pagsaka sang COVID-19 cases sa Department of Health (DOH), Department of the Interior and Local Government (DILG) kag Philippine Coast Guard (PCG).
Sa interview sang Bombo Radyo kay Dr. Roland Jay Fortuna, focal person for COVID-19 sa syudad sang Iloilo, iya ginpahayag nga mas mataas ang narekord nga kaso sang COVID-19 sang bulan sang Enero nga nagadangat sa 331 kun ipaanggid sa 279 nga narekord sang December 2020.
Nahibaluan nga 10 ang narekord nga napatay bangud sa COVID-19 sang nagligad nga bulan kag 8 naman ang napatay sang December 2020.
Suno kay Fortuna, temporaryo anay nga suspendihon ang mass gathering sa sulod sang isa ka semana agud ma kontrol ang pagtimbuok sang kaso sang COVID-19.
Samtang, isa naman sa ginalantaw nga mayor nga rason ni Fortuna sang local transmission sang COVID-19, amo ang pagkakas sang face mask sa tion nga magkaon sa diin indi malikawan ang pagtalsik sang laway.
