ILOILO CITY – Naglab-ot na sa 18 ang kumpirmado nga kaso sang Coronavirus Disease 2019 (COVID-19) sa Western Visayas.
Ini ang kasunod sang pagpaguwa sang bulletin sang Department of Health 6 as of 5:00 sang Marso 30.
Sa interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health 6, iya ginpahayag nga ang Patient #17 amo ang 44 anyos nga lalaki gikan sa Jaro, Iloilo City kag may travel history sa Metro Manila.
Magluwas diri, ginpahayag man ni Juanico nga ang Patient #17 ang naka-angkon sang close contact sa Patient #3 kag sa subong, nagapaidalom na sa 14-day home quarantine.
Ginpahayag ni Juanico nga ang Patient #18 naman amo ang 51 anyos nga babayi gikan sa Guimbal, Iloilo kag may close contact sa Patient #2.
Ang Patient #18 suno sa natungdan ang nagapabilin nga asymptomatic kag nagapaidalom sa home quarantine samtang indi pa makumpirma kun bala positibo ukon negatibo sa COVID-19 ang pasyente nga napatay sa Antique.
As of March 26, ginpahayag ni Juanico nga naglab-ot sa 120 ang specimen nga ginpaidalom sa test kag ginahulat na lang ang resulta.
