GUIMARAS- Kalabanan sa mga pinaka-apektado sang Dengue sa Guimaras amo ang mga kabataan nga naga-edad sang anom tubtob napulo ka bulan.
May yara sang 87 ka kaso kag isa ang patay sa banwa sang Jordan, may 70 ka kaso sa Buenavista, may 50 ka kaso kag isa ang patay sa banwa sang Nueva Valencia, 39 ka kaso sa Sibunag kag 36 ka kaso sa bahin sang San Lorenzo.
Nagpanawagan si Guimaras Governor Samuel Gumarin sa mga pumuluyo nga limpyuhan ang palibot ilabi na ang gina-tiniran sang lamok.
Nagpatigayun man sang blood letting activity sa diin nakatipon sila sang 17,000 cubic cm sang dugo agud mapasigurado nga may yara sang nagakaigo nga suplay ang probinsya.
Samtang sa interview sang Bombo Radyo kay Genard Dela Cruz, health promotion and education officer kag dengue coordinator sa Guimaras, iya ginpahayag nga nagakadapat masami ang pagpanglimpyo sa palibot.
Kun may yara man sang kaso sang Dengue, nagakadapat nga ipahibalo ini sa gilayun sa Local Government Unit (LGU) agud nga gilayon nga maaktuhan.
