ILOILO CITY – Masobra sa 500 ang kaso sang Dengue sa syudad sang Iloilo subong nga 2019.
Sa interview sang Bombo Radyo kay Dr. Bernard Caspe, pinuno sang City Health Office, iya ginpahayag nga humalin sang Enero 1 tubtub Hunyo 14, naglab-ot na sa 549 ang kaso nga Dengue sa diin apat na ang patay.
Ginpahayag ni Dr. Caspe nga kalabanan sa mga biktima sang Dengue amo ang mga bata nga naga-edad sang 1 tubtub 15 anyos.
Sa tagsa ka tuig, may yara sang pattern ang pagtuhaw sang nasambit nga balati-an.
Sa syudad sang Iloilo, ang Barangay San Juan sa distrito sang Molo ang nagapanguna sa listahan sa may pinakamadamo nga kaso sang Dengue.
Bangud sini, ginpahayag ni Dr. Caspe nga hugot ang kampanya sang City Health Office agud nga matapna ang pagduging sang nasambit nga balati-an.
Liwat nga ginpahanumdom sang natungdan ang kampanya sang Department of Health (DOH) ang 4S ukon Search and Destroy Breeding Places, Self Protection, Seek Early Consultation kag Support fogging ukon misting.
Sa subong suno kay Dr. Caspe, sa baylo nga fogging, misting na ang ginapatigayon sa diin wala na sang aso nga ginabuga ang machine.
Bangud nga indi man maubos sang DOH ang 180 ka mga barangay sa syudad sang Iloilo, mas makapaayo suno sa natungdan nga magmatu-mato ang tagsa ka pumuluyo sa pagpaninlo agud nga wala sang pugaran ang lamok.
