Naglab-ot na sa 1,959 ang kaso sang dengue sa Iloilo halin Enero 1 tubtob Mayo 31, 2025.
Sa interview sang Bombo Radyo kay Dr. Rodney Labis, Chief sang Health Service Delivery Division sang Provincial Health Office, iya ginpahayag nga ang numero ang mataas sang 78% kumparar sa kapareho nga period sang 2024 nga may 1,102 ka kaso.
Suno kay Labis, pinakamadamo nga kaso ang narekord sa San Joaquin (151), ginsundan sang Oton (115), Leon (99), Cabatuan (95), kag Dumangas (91).
Dugang sini nga siyam na ang napatay bangud sang dengue, lakip ang tig-duha sa Pototan kag Carles, kag tig-isa sa Oton, Sara, Tigbauan, Dueñas, kag Balasan.
Kadam-an sa mga biktima ang naga-edad 1 tubtob 9 ka tuig.
Ginmanduan naman ni Governor Arthur Defensor Jr. ang Provincial Disaster Risk Reduction and Management Council (PRRMC) nga palig-onon ang kampanya kontra dengue bangud nagasugod na ang tig-ululan.
