Naglab-ot na sa 7,793 ang kaso sang dengue, samtang 20 naman ang napatay nga nabalhag sang Iloilo Provincial Health Office (IPPO) sa Iloilo.
Bangud diri, magabaton sang financial assistance ang 43 ka mga Local Government Units sa probinsya sang Iloilo bilang bulig sang Iloilo Provincial Government sa paghimo sang mga tikang batuk sa dengue.
Sa interview sang Bombo Radyo kay League of Municipalities of the Philippines-Iloilo Executive Vice President for Internal Affairs kag Badiangan Mayor Suzette Mamon, ang pondo ang may tinutuyo nga mapasangkad pa ang mosquito control programs sang local government units kag awareness campaign amo man ang pagbakal sang mga medical supplies.
Suno kay Mamon, lain-lain ang balor sang pondo nga ihatag sa mga LGUs nakadepende sa kategorya sang banwa kaangay na lang sa mga dalagko nga banwa nga makabaton sang P300,000 samtang sa mga gagmay nga banwa makabaton naman sang P200,000 ukon P100,000.
Ginpahayag man sini nga ang P9.1 million nga budget ang magahalin sa Philippine Disaster Risk Reduction and Management (PDRRM) fund donations sang sang Iloilo Provincial Government.
Nagpanugyan man ang natungdan sa publiko nga pangitaon ang mga lugar nga posible pangitlogan sang lamok kag gilayon nga limpyohan agud nga indi na mangin breeding ground sang mga lamok.
