ILOILO CITY – Nagsaka sa masobra 100 porsyento ang numero sang dengue sa probinsya sang Antique kun ikumpara sang nagligad nga tuig humalin sang Enero tubtob sa Mayo 28.
Sang 2021, may yara sang kabug-usan nga 211 ka kaso sang dengue sa probinsya samtang may 521 naman nga na-record subong nga tuig nga may pagsaka nga 147%.
Ang numero sang nagkalamatay ang nagsaka man sa tatlo humalin sa record sang nagligad nga tuig nga isa lang ka kaso.
Ang banwa sang Sibalom ang may yara sang pinakamadamo nga kaso nga nagdangat sa 128 ka kaso, ginasundan sang San Jose nga may 123, Hamtic nga may 65, Bugasong nga may 58 kag Anini-y nga may 38.
Sa interview sang Bombo Radyo kay Sheree Vego, Nurse -IV sang Public Health Programs sang Antique Provincial Health Office, iya ginpahayag nga kalabanan sang mga na-igo sang balatian amo ang mga kabataan.
Sang bulan sang Pebrero, nagsugod na ang advocacy kag awareness program sang Antique Provincial Health Office kag nakapatigayon na sang collaborative meeting upod ang mga stakeholders.
May ginhanda naman nga ward sa mga ospital bilang preparasyon sa posible nga surge sang dengue.
