GUIMARAS – Nagtaas ang numero sang kaso sang dengue sa probinsya sang Guimaras.
Sa interview sang Bombo Radyo kay Zenard Dela Cruz, Health Education and Promotion Officer, iya ginpahayag nga nagikan sa 282 sang Hunyo 27, 2019, nagdangat na ini sa 493 ka mga kaso sang dengue sang Hulyo 10.
Santu sa rekord sang Provincial Health Office, nagapanguna ang Jordan nga may 153 ka kaso sang dengue; 109 sa Buenavista; 93 sa Nueva Valencia; 72 sa Sibunag kag 66 naman sa San Lorenzo.
Samtang isa naman ang patay sa Jordan kag isa man sa Nueva Valencia bangud sa dengue hemorrhagic fever.
Suno kay Dela Cruz, magapatigayon subong nga adlaw sang pagsinapol ang mga health officers sang probinsya sang Guimaras kaupod si Governor Samuel Gumarin agud nga ma istoryahan kun mahimo na nga ideklarar nga dengue outbreak ang nasambit nga probinsya.
Nagpangabay man ang natungdan nga magpanglimpyo sa palibot agud malikawan ang dengue.
