ILOILO – Ginalaoman sang Provincial Health Office sang Iloilo Provincial Government nga magnubo ang kaso sang dengue hemorrhagic fever subong nga tuig 2020.
Sa interview sang Bombo Radyo kay Dr. Patricia Grace Trabado, pinuno sang Provincial Health Office, iya ginpahayag nga sang tuig 2019, na rekord sang ahensya ang 22,040 tanan ka mga kaso kag 78 ang mga nagkalamatay bangud sa dengue.
Suno kay Trabado, yara na sa below alert level ang kaso sang dengue sa pribinsya sang Iloilo.
Sa data sang Provincial Health Office, may yara sang walo ka mga kaso sang dengue nga na rekord sang Disyembre 1 tubtob Disyembre 7; 26 ang na rekord sang Disyembre 8 tubtob 14 samtang isa naman ang na rekord nga kaso sang Disyembre 15 tubtob 21, 2019.
Apang nagpaandam si Trabado nga wala sang ginapili nga season ang lamok nga may dala nga dengue.
Panugyan sang Provincial Health Office Head sa publiko, sundon ang 4S kontra dengue nga ginalakipan sang “Search and destroy” mosquito-breeding sites, employ “Self-protection measures”; “Seek early consultation”, kag “Support fogging/spraying”.
