Nagsaka ang kaso sang dengue sa probinsya sang Iloilo subong nga tuig, base sa pinakabag-o nga datos halin sa Iloilo Provincial Health Office.
Sa Interview sang Bombo Radyo kay Maeden Quiñon, ang Health Promotion Unit Head sang nasambit nga ahensya, iya ginpahayag nga naglab-ot na sa 1,733 ang kaso sang dengue nga narecord subong nga tuig kun sa diin siyam gid diri ang napatay.
Suno kay Quiñon, ini nga numero ang mas mataas kumparar sa 983 ka kaso nga na-record sang nagligad nga tuig kun sa diin nagsaka ini sang 77%.
Ang pinakaulihi nga biktima sang dengue amo duha ka tuig nga bata nga lalaki nga tumandok sang Sara, Iloilo kun sa diin ginbawian ini sang kabuhi sang Abril sini nga tuig.
Padayon nga nagahingyo ang IPHO sa publiko nga mag-practice sang 4S Strategy Kontra Dengue kag siguraduhon gid nga magpanglimpyo sa palibot agud malikawan ang pagdamo sang lamok.
