ILOILO – Padayon nga nagasaka ang kaso sang dengue sa probinsya sang Iloilo.
Santu sa rekord sang Iloilo Provincial Health Office humalin sang Enero tubtob Hulyo 2019, nagdangat sa 5,435 ka mga kaso sang dengue sa probinsya.
Sa interview sang Bombo Radyo kay Dr. Maria Socorro Quiñon, provincial health officer, iya ginpahayag nga kinahanglan padayunon sa gihapon ang pagpaninlo sa palibot ilabi na sa pagpangita sang mga gina-itlogan sang mga manok kag kinahanglan man nga tumanon sang mga buluthuan ang spraying duha tubtob tatlo ka beses sa isa ka tuig agud matapna ang dengue.
Suno kay Quiñon, may yara na sang 20 ka patay nga na rekord ang ahensya sa bug-os nga probinsya.
Dugang pa sang natungdan, nagapanguna nga banwa sa probinsya nga may pinakamadamo nga kaso sang dengue sa sulod sang Enero tubtob Hulyo 2019 amo ang Pototan nga may 492 kag tatlo ang patay; Passi City nga may 398 kag isa ang patay; Concepcion nga may 315 kag apat ang patay; Sara nga may 309 kag isa ang patay; Calinog nga may 262 kag Ajuy nga may 249 lunsay wala sang patay; Cabatuan nga may 204 kag isa ang patay; Janiuay nga may 187 kag wala sang patay; Lambunao nga may 178 kag isa ang patay; Sta. Barbara nga may 177 kag isa ang patay samtang ang San Dionisio ang may 177 man ka kaso sang dengue.
