ILOILO CITY – Naglab-ot na sa kapin 3,000 ang kaso sang Dengue Hemorrhagic Fever sa syudad sang Iloilo sa diin 16 na ang patay.
Sa interview sang Bombo Radyo kay Dr. Bernard Caspe, pinuno sang City Health Office, iya ginpahayag nga santo sa record as of September 7, 2019 naglab-ot sa 2,720 ang kaso sang Dengue.
Suno kay Caspe, ang Brgy. Balabago sa distrito sang Jaro ang nagpanguna sa may pinakamadamu nga kaso sang Dengue nga sadto anay ang Brgy. San Juan sa distrito sang Molo ang nagapanguna sa listahan.
Ginpahayag ni Caspe nga isa sa mga rason kun nga-a ang distrito sang Jaro ang nagapanguna kun Dengue ang pagahambalan amo nga madamu sang wayang ukon bakante nga lote ang makita sa nasambit nga area.
Bangud sini, ginpahayag ni Caspe nga magapatigayon sang ika tatlo nga hugnat sang misting agud nga matapna ang pagduging sang nasambit nga balati-an.
Sa pihak sini, ginpahayag sang natungdan nga temporaryo anay nga ginpasirado ang hydration center sa La Paz Maternity Clinic bangud nga naggamay ang numero sang mga Dengue patient.
Nagalaum si Caspe nga indi na masulit pa nga may matabo nga Dengue outbreak sa syudad sang Iloilo.
Samtang, ginkumpormihan ni Punong Barangay Edgar Arañador sang nasambit nga lugar ang pahayag ni Dr. Bernard Caspe nga madamu sang wayang ukon bakante nga lote sa distrito sang Jaro.
Suno kay Arañador, naglab-ot sa 84 ang kaso sang Dengue sa ila lugar rason nga dapat nga regular ang ginapatigayon nga misting.
Magluwas diri, ginpahayag man ni Arañador nga nagakadapat man nga ipabilin sang mga pumuluyo ang pagpaninlo sang ugsaran agud nga wala sang istaran ang lamok nga nagadala sang virus.
