May yara na sang 2,305 ka kaso sang dengue hemorrhagic fever ang na rekord sang Department of Health Region 6 sa Western Visayas.
Sa interview sang Bombo Radyo kay Dr. Jessie Glen Alonsabe, pinuno sang epidemiology and surveillance unit sang Department of Health Region 6, iya ginpahayag nga may yara sang apat ka mga napatay bangud sa dengue sa diin isa sa Antique, isa sa syudad sang Iloilo, isa man sa Aklan kag isa sa Negros Occidental.
Suno kay Alonsabe, sa 2,305 ka kaso, 295 diri ang na rekord sa Aklan, 170 sa Antique, 159 sa Iloilo City, 442 sa Iloilo Province, 154 sa Bacolod, 785 sa Negros Occidental kag 239 ka iban.
Pahayag niya, apisar may yara sang ginapangatubang nga COVID-19 outbreak ang kalibutan, kinahanglan man bantayan kag mag aligmat ang mga pumuluyo sa pagsaka sang kaso sang dengue.
Liwat man nga ginpanugyan sang ahensya nga sundon ang 4S ukon Search and destroy mosquito-breeding sites, secure Self-protection measures, Seek early consultation, kag Support fogging/spraying sa mga hotspot areas.
