Naglab-ot na sa 534 ka mga kaso sang hand, foot, and mouth disease (HFMD) ang na-record sang Iloilo Provincial Health Office (IPHO) sugod Enero 1 tubtob Mayo 10, 2025.
Sa interview sang Bombo Radyo kay Dr. Rodney Labis, Provincial Health Officer, iya ginpahayag nga ang nasambit nga numero ang mas mataas sang 100% kon ikumpara sa kaparehas nga time period sang nagligad nga tuig.
Suno kay Labis, nakit-an ang matag-as nga kaso sa mga banwa sang Carles, Concepcion, Barotac Nuevo, Sta. Barbara, kag Balasan.
Gin-athag man sini nga kalabanan sa kaso amo ang naga-edad lima ka tuig manubo bangud man sa amo nga edad, naga-develop pa lang ang isa ka bata sang immunity batok sa mga virus.
Nagpanugyan man ang natungdan sa mga ginikanan nga i-monitor gid ang kondisyon sang bata kun makataan sang sintomas kaangay sang hilanat, rashes, kag mouth lesions.
Kun may makit-an nga senyales, dapat gid nga mag-isolate agud nga indi na maglaton sa iban. Gina-abisuhan man ang tanan nga masami gid maghugas sang kamot kag maggamit sang alcohol-based sanitizers.
Nahibaluan nga ang iban pa nga sintomas sini nga kondisyon amo ang pagkadula sang gana sa pagkaon, pagsakit sang tutunlan, kag pagpalangapoy.
