ILOILO CITY – Nadugangan pa sang 450 ka kaso sang hand, foot and mouth disease ang probinsya sang Iloilo sa sulod lang sang isa ka semana.
Santu sa data sang Iloilo Provincial Health Office, naglab-ot na a 674 ang kabug-usan nga kaso sang nasambit nga balatian humalin Enero 1 tubtob Enero 28, 2023.
Kun ipaanggid sang 2022, nagapabilin nga duha lang ang kaso nga narekord sa nasambit nga period.
Sa interview sang Bombo Radyo kay Dr. Ma. Socorro Quiñon, pinuno sang Provincial Health Office, iya ginpahayag nga ang gulpyada nga pagsaka sang kaso sang hand, foot and mouth disease ang bangud sa pag-resume sang face-to-face classes, pagbukas sang play centers sa mga mall sa diin amo ni ang mga lugar nga madasig malatnan sang balatian ang mga kabataan.
Gani suno kay Quinon, kun may hilanat ukon bitog-bitog ang bata, indi na ini pagpasudlon sa eskwelahan bangud makalalaton ang amo nga balatian.
Pila sa mga senyales kag sintomas sang hand, foot and mouth disease amo ang hilanat, sore throat, pagtubo sang bitog-bitog sa dila, gums kag sulod sang cheeks, red rash kag pagkadula sang gana sa kaon.
Ang top 10 nga mga banwa nga may pinakamataas nga kaso sang hand, foot and mouth disease subong nga 2023 amo ang mga masunod;
Santa Barbara – 90
Barotac Viejo -48
Alimodian – 43
Badiangan – 43
Calinog – 39
Leon -39
Pototan – 37
San Dionisio – 33
Bingawan – 32
Pavia – 31
