ILOILO CITY – Halos pila gid ka pilo ang ginsaka sang kaso sang hand, foot and mouth disease sa probinsya sang Iloilo.
Sa data sang Provincial Epidemiology and Surveillance Unit, 398 lang ka kaso sang hand, foot and mouth disease ang narekord sang tuig 2022 samtang subong nga 2023, naglab-ot na ang kaso sa 3,388 humalin Enero 1 tubtob Hunyo 24.
Ini ang nagtaas sang 785 percent.
Sa 42 ka mga banwa kag isa ka component city, ang Carles lamang sa Northern Iloilo ang wala sang kaso nasambit nga balatian.
Sa interview sang Bombo Radyo kay Dr. Maria Socorro Quiñon, head sang Iloilo Provincial Health Office, iya ginpahayag nga ang hand, foot and mouth disease ang characterized sang sores sa bibig kag rashes sa kamot kag tiil sa diin, common ini nga infection sa mga kabataan.
Mahibaluan nga may yara sang hand, foot and mouth disease ang indibidwal base sa sintomas sini kaangay na lang sang hilanat, sore throat, pagbatyag sang sakit sa dila, gums kag iban pa nga bahin sang lawas nga ginatubuan sang blister ukon bitog-bitog, kag pagkadula sang gana nga magkaon.
Nagpangabay si Dr. Quiñon sa mga ginikanan nga giyahan ang mga kabataan sa pag-proteher sang ila kaugalingon kaangay sang proper hygiene lakip na ang masami nga paghugas sang kamot agud malikawan nga matapikan sang nasambit nga balatian.
Gina-discourage man ang close contact sa tawo nga infected sang hand, foot and mouth disease.
Apang sa tion nga magpakita na sang signs and symptoms ang bata sang balatian, gina-abisuhan ang ginikanan nga indi na pagpakadtuon pa sa eskwelahan ang bata agud indi na makalaton pa sa iya mga classmates.
