Naka-record ang Iloilo Police Provincial Office (IPPO) sang gamay nga pagnubo sang numero sang kaso sang kinawatay sa probinsya subong nga tuig ipaanggid sang 2024.
Sa data halin sang Enero 1 tubtub Oktubre 8, 2025, may 20 ka robbery cases sa Iloilo nga mas manubo sa 28 nga napagkit sa amo man nga binulan sang 2024.
Sa interview sang Bombo Radyo kay Police Major Rolando Araño, spokesperson sang IPPO, iya ginpahayag nga ginpasangkad ang police visibility sa probinsya sa adlaw kag sa gab-i paagi sa padayon nga pagpatrolya sang mga personnel.
Suno kay Araño, may gintukod nga operations center sa mga estasyon sang pulis agud nga ma-monitor ang hulag sang patrollers kag ang ila nga deployment.
Kun may nabaton naman nga reports suno sa iya, madasig man ang pulis sa pag-validate sang impormasyon kag ginahibalo kun ano ang tuyo kun may makit-an nga makaduluda nga mga indibidwal.
Sa data naman sang Police Regional Office 6 (PRO-6), nagnubo ang crime incidents sa bilog nga Western Visayas sa 14,380 halin sang Enero tubtub sa Septyembre. Mas manubo ini ipaanggid sa 14,589 incidents nga na-rekord sa amo man nga period sang 2024.
Una na nga ginpahayag ni PRO-6 director Brig. Gen. Josefino Ligan nga ini nga pag-us-os sang trend sa mga krimen ang nagapakita kun ano ka-epektibo ang intensified operations kag aktibo nga community engagement sang pwersa sang kapulisan.
Ginaangot man ini sang opisyal sa crime prevention strategies, data-based deployment sang personnel kag pagpakig-angot sa local stakeholders.#
