Gintugyan ni Iloilo City Mayor Jerry Treñas sa Iloilo City Legal Office ang dismissal order nga ginpangayo sang legal counsel sang Book Binder II sang City Civil Registrar’s Office nga amo ang ginaangot bilang bagman ni anay Local Civil Registry head Mr. Juncae Manikan tuhoy sa ginapahayag 180 ka peke nga kasal sa syudad.
Siya amo si Joe Mari Esteral nga nangin kontrobersyal sang 2019 matapos ginkasuhan sang gross insubordination, grave misconduct, kag gross neglect of duty bangud nagbalik siya sa iya trabaho sa Local Civil Registrar office.
Ini apisar nga wala sang mandu sa iya nga magbiya sa trabaho matapos nga ginreaasign siya ni Mayor Treñas sa Calajunan Dumpsite sa Mandurriao, Iloilo City.
Sa interview sang Bombo Radyo kay Treñas, iya ginpahayag nga wala pa sila sang desisyon nga ginpagwa sa status ni Esteral bangud padayon pa siya nga nagapakig-angot sa Legal Office sang syudad.
Suno sa natungdan, may kaangtanan naman sa ginahingyo sang kampo ni Esteral nga swelduhan siya sa mga panahon nga wala siya gintugtan nga magreport sa trabaho umpisa sang Nobyembre 2019, depende sa pa ini sa mangin desisyon man sang Legal Office.
Samtang, hugot nga ginpanindugan sang legal counsel ni Joe Mari Esteral nga nagakadapat ang maghimo sang desisyon natuhoy sa kaso sang iya kliyente amo ang alkalde mismo sang syudad sang Iloilo.
Sa interview sang Bombo Radyo kay Atty. Hernando Galvez, iya ginpahayag nga nagakadapat nga ang magareply sang iya mga sulat kay Iloilo City Mayor Jerry Treñas amo mismo ang alkalde kag indi ang Iloilo City Legal Office.
Ginpanindugan ni Galvez nga ang City Legal Office ang nagakadapat nga maghatag lamang sang legal advice kay Treñas kag depende na sa alkalde ang desisyon nga himoun.
Pahayag sang natungdan, wala man sang otoridad ang legal office nga magmando kun ano ang pinal nga desisyon kundi si Mayor Treñas lamang.
