ILOILO CITY- Nagtaas ang numero sang kaso sang leptospirosis sa probinsya sang Iloilo sa tuig 2023.
Sa interview sang Bombo Radyo kay Dr. Rodney Labis, Chief sang Health Service Delivery Division sang Integrated Provincial Health Office (IPHO), iya ginpahayag nga naka-record ang ahensya sang 385 nga kaso sang leptospirosis sa diin 16 ang napatay.
Suno kay Labis, mas mataas sang 140% ang kaso sang 2023 kung ikumpara sa na-record nga kaso sang 2022 nga naglab-ot lang sa 147.
Ang mga banwa nga may mataas nga kaso base sa ‘per attack rate per 10,000 population’ amo ang Cabatuan, Anilao, Banate, Pototan, Barotac Nuevo, Oton, Santa Barbara, San Miguel, Alimodian kag San Enrique.
Sandig sa data sang Integrated Provincial Health Office, kadam-an sa mga kaso nga nakuha sang mga biktima ang may aktibidad sa pagpanguma kag palayan sa diin kalabanan sa pasyente amo ang mga mangunguma.
