ILOILO CITY – Nagsaka sang halos 300% ang kaso sang leptospirosis sa probinsya sang Iloilo subong nga tuig.
Sa data sang Iloilo Provincial Health Office humalin sang Enero tubtob Hunyo 24, may yara sang na-record nga 107 cases nga 296% nga mas mataas sa na-record sang 2022 nga may yara lamang sang 27.
Lakip sa mga banwa nga may mataas nga kaso subong nga tuig amo ang Cabatuan nga may 14, Barotac Nuevo nga may 12, Pototan nga may 11, Anilao nga may pito, Dingle kag Oton nga may tag-lima.
Sa nasambit nga data, duha na ang napatay nga nagikan sa Badiangan kag Carles.
Sa interview sang Bombo Radyo kay Dr. Rodney Labis, pinuno sang Health Service Delivery Division sang Iloilo Provincial Health Office, iya ginpahayag nga kalabanan sa mga kaso ang nakuha nagikan sa pagpanguma kag paglusong sa tubig baha.
Bangud sini, ang mga local government unit nga may kaso sang leptospirosis ang nagapatigayon sang response activities kag health promotion programs pinaagi sa ila tagsa ka rural health units.
Lakip na diri ang pag-upod sa pagsinapol sang farmers association sa ila lugar kag pagbakal sang prophylaxis nga isa ka antibiotic agud nga mahagan-hagan ang infection, antes ukon pagkatapos sang potential exposure.
Gina-mobilize man ang mga personnel sang rural health units sa bulig sang Barangay Nutrition Scholars agud nga mapahapos ang pag-access sang komunidad sa paglikaw sa nasambit nga balatian.
Dugang pa niya, ang mga personnel nagikan sa Provincial Health Unit ang nagalibot man agud nga mag-augment sa mga kabanwahanan.
Ang leptospirosis ang sakit nga halin indi lang sa ihi sang ilaga kundi mangin sa ido, kuring, baboy, baka kag kabayo.
