ILOILO – Naglab-ot sa 69 ang kaso sang suicide sa probinsya sang Iloilo humalin sang Enero tubtub Oktubre 2019.
Sa interview sang Bombo Radyo kay Dr. Neneth Pador, pinuno sang Provincial Social Welfare and Development Office, iya ginpahayag nga 61 sa mga biktima ang naghikog bangud sa depresyon, 2 ang may nervous breakdown, 4 ang family problem, 1 ang mental instability kag 1 man ang tuga sang third party.
Suno kay Pador, naglab-ot sa 22 ka pamilya ang napadulungan nila agud nga usisaon kun ano gid ang rason sang paghikog sang mga biktima.
May kaangtanan diri, ginpahayag ni Pador nga P5,000 ang maximum nga ginahatag nga bulig sa mga pamilya nga nalisdan.
Bangud nga ang bulan sang Nobyembre ang ginakabig nga International Children’s Month, ginpahayag ni Pador nga may yara sang seminar nga patigayunon sa diin ang mga dinapit nga bisita ang lunsay mga eksperto tuhoy sa mental health.
Katuyu-an sang nasambit nga aktibidad suno sa natungdan amo nga matapna ang nagataas nga kaso sang suicide sa probinsya sang Iloilo.
