Makaalarma ang numero sang suicide sa Western Visayas subong nga may yara sang pandemya.
Sa interview sang Bombo Radyo kay PCol. Gilbert Gorero, tagpamaba sang Police Regional Office 6, iya ginpahayag nga humalin Enero tubtob Hulyo 2019, may yara sang 122 nga mga kaso sang suicide ang narekord samtang 164 naman ka mga kaso sang suicide ang na rekord sa amo nga mga bulan subong nga tuig 2020.
Kun pahat-pahaton ang numero sang mga suicide cases humalin Enero tubtob Hulyo 2020;
Aklan – 15
Antique – 14
Bacolod – 13
Capiz – 19
Guimaras – 18
Iloilo City – 11
Iloilo Province – 48 kag;
Negros Occidental – 26
Suno kay Gorero, indi madali nga maka recover sa depression ang mga kabataan ilabi na kun mas madamo pa ang oras nga ginatutok sini sa mga gadgets kag kun wala sang oras ang ginikanan sa pag-istorya sa ila.
Mas maayo pahayag sang natungdan nga may yara sang specialista nga makalantaw sa kondisyon sang bata agud mahibaluan kun ano ang rason sang iya nga ginabatyag.
Ang pagbatyag sang depression ang indi pag-inarte suno kay Col. Gorero kag indi man mahimo mabasol ang mga kabataan bangud may yara sang mga rason kun ngaa nagakabatyag ini sang tuman ka subo.
May mga epekto man sa pamatasan sang mga kabataan ang pag suspende sang klase subong nga may pandemya bangud ang iban sa ila ang nagakabatyag sang boredom apang indi dapat ini pagkabigon nga negatibo.
Nagpanugyan si Gorero sa mga ginikanan nga subong nga may community quarantine, mangin kahigayunan ini agud nga mahatagan sang bastante nga oras ang mga kabataan kag agud nga makilala pa sang maayo kag mahibaluan ang ila mga naluyagan.
Parental care kag Parental love ang kinahanglan sang mga kabataan kag indi lamang ang mga material nga bagay.
