Ginbalikan ni Senator-judge Raffy Tulfo sa impeachment court ang kaso sang isa ka manunudlo sang 2020 nga gin-aresto gilayon bisan nga wala sang arrest warrant kasunod sang death threat batok kay former President Rodrigo Duterte.
Ang teacher amo si Ronnel Mas nga nagtanyag sang P50-million reward sa sin-o man nga makapatay kay Duterte nga amo ang presidente sang amo nga tion.
“I will give 50 million reward kung sino makakapatay kay Duterte. #NoToABSCBNShutDown,” tweet ni Mas sang amo nga tion.
Pagkaligad lang sang pila ka adlaw, na-identify nga siya ang nag-post sa Twitter kag gindakop siya gilayon sang National Bureau of Investigation (NBI).
Natingala si Tulfo kun ngaa wala ini ginhimo kay Vice President Sara Duterte bisan nga may gina-alegar nga pamahog man ini nga ginbuy-an batok kay President Ferdinand “Bongbong” Marcos, Jr.
“So isang guro, nagbanta sa dating Pangulo, agad-agad inaresto nang walang warrant. Now, itong si Vice President Sara Duterte, na nagbanta rin kay Pangulong Marcos. Anong difference ng dalawa?” suno kay Tulfo.
Sang ginkwestyon si NBI Director Melvin Matibag, ginsiling sini nga gindakop gilayon sang NBI Regional Office 1 ang manunudlo matapos gin-tratar ang iya statement nga “serious threat” indi lamang kay Duterte kundi mangin sa national security.
Ginkwestyon naman ni Tulfo kun ano ang kinalain sini sa kaso ni VP Sara nga gin-akusaran man nga nagpamahog kay Marcos.
Suno kay Matibag, isa ka obvious nga rason amo nga teacher si Mas, samtang vice president naman si Sara.
Diri kag ginkwestyon ni Tulfo kun nagakahulugan bala ini nga indi patas ang NBI sa pagtratar sa mga ordinaryo nga mga pumuluyo kag sa mataas nga mga opisyal.
Ginkwestyon man sang senador kun ngaa wala gindakop si Davao City Mayor Sebastian “Baste” Duterte matapos ini nagpahayag sa isa ka pro-Duterte rally nga isa lamang ka “ulo” ang iya gusto—ang ulo ni Presidente Marcos.
Suno kay Matibag, nag-halong ang mga imbestigador bangud sa posible nga legal nga mga komplikasyon may kaangtanan sa warrantless arrest, kag ginhimo niya nga ehemplo ang kaso ni Ronnel Mas bilang isa ka warning.
Nagbalibad si Matibag nga magkomento sa mga nagligad nga lihok sang NBI sa kaangay nga mga kaso kag nagsiling nga ang mahimo lamang niya nga kumentuhan amo ang nagapadayon nga imbestigasyon sang ahensya sang yara na siya sa bureau.
Ginpahayag man sini nga base sa iya mga pakighinun-anon sa mga kapareho niya nga law enforcement officials sa iban nga pungsod, ang isa ka bise presidente nga maghimo sang kaangay nga pamahog ang mahimo gilayon nga dakpon kag mapahalin sa puwesto sa pila ka mga hurisdiksyon.
“Ang warrantless arrest po kasi, kagaya ng nangyari kay Ronnel Mas, dahil naging warrantless arrest, siya po ay na-dismiss ang kaso. So iyon din po yung iniingatan namin, na kung kami ay gagawa ng warrantless arrest, ay maaari pong ma-dismiss ang kaso,” suno kay Matibag.
“Ngayon po, kasama po iyan sa case build-up namin na maaaring magdulot po ng pag-file ng nararapat na kaso,” dugang sang director.#
