ILOILO CITY- Nagnubo ang numero sang narecord nga vehicular aksidente kadungan sang pagsulod sang bag-ong tuig.
Sa interview sang Bombo Radyo kay Pol. Lt. Col Efren Lozada, pinuno sang Traffic Investigation and Enforcement Unit sang Iloilo City Police Office, iya ginpahayag nga walo(8) lang ang nagluntad nga aksidente sa diin duha(2) diri ang naga-involve sang physical injuries samtang ang anom naman ang naga-involve sang damage to properties.
Mas manubo ini sa narekord sang pagsulod sang 2019 nga may yara sang 13 ka kaso.
Suno kay Lozada, kalabanan sa mga rason sang pagluntad sang aksidente amo ang nagadali nga mga drivers ilabi na nga madamo ang selebrasyon sa pagsug-law sang bag-ong tuig.
Samtang ,natalana naman nga pasakaan sang kaso ang taxi driver nga nagbunggo sa motorsiklo sa North Avanceña, Molo, Iloilo City sa diin lima ka tawo ang nagkalapilasan.
Kaso nga reckless imprudence resutling to multiple physical injury ang atubangon ni Aries John Dabucon sang Mandurriao.
Matandaan nga nadulaan sang kontrol si Dabucon sang magbunggo sa iya taxi ang motor nga ginamaneho ni Nazareno Pagayon nga nakaangkon pa sang daku nga pilas sa ulo.
Nasagairan naman sanday Honesto Villamor, 68 anyos; Carla Casanova, 14 anyos;Dianne Conception, 13 anyos kag;Shanelle Shai Diaz, 5 anyos.
