Kaso vs 14 pulis nga nagpatigayon sang madugo nga raid, may probable cause – RIAS

ILOILO CITY – May probable case ang duha ka kaso administratibo nga ginpasaka batok sa 14 ka mga pulis nga katapo sang Criminal Investigation and Detection Group (CIDG) kag Special Action Force (SAF) kasunod sang ginpatigayon nga raid sa Brgy. Santa Rosa-Laguna, Guimbal, Iloilo masobra duha ka tuig na ang nagligad.
Magapangatubang sang kaso nga grave misconduct ang mga miyembro sang CIDG nga ginalakipan nanday Chief Insp. Fernando Salvattiera nga anay chief sang CIDG; Insp. Ronole Bagayao; SPO2 Alberto Sombilon; SPO1 Aldren Bigan kag PO1 Melvin Mocorro.
Samtang sa bahin naman sang SAF, lakip sa mga guilty sa nasambit nga kaso amo sanday S/Insp. Regie Delmos, PO3 Agustin Macajilig, PO3 Jerson Covera, PO2 Harry Langkawa, PO1 Danny Donglan, PO1 JR Belesario, PO2 Mario Bagos, PO1 Ericson Destalia kag PO1 Junel Ngawoy.
Ginpasakaan man sang kaso nga serious neglect of duty sanday Insp. Renon Bagayao, SPO2 Sumbilon, PO3 Macajilig, PO3 Corvera kag PO2 Langkawa.
Natukiban sa imbestigasyon sang Regional Internal Affairs Service (RIAS) nga may conspiracy ukon paghimbon ang mga pulis kag pamilya Gial batok sa biktima nga si Elias Bilbao.
Nagalab-ot sa 280 ka adlaw naman nga suspension ang ipatuman sa mga pulis nga ginpasakaan sang kaso administratibo samtang gin-dismiss naman ang kaso nga murder nga ginpasaka sa mga natungdan.
Samtang ginbasura naman sang korte ang kaso kriminal nga ginpasaka sa nasambit nga mga pulis.
Matandaan nga isa ang patay sa diin duha ang pilason sa pagluthanganay sang mga tinawo sang magkaaway nga pamilya kadungan sang pagserbe kuntani sang mga pulis sang search warrant sa isa ka balay.
Patay sa insidente si Bilbao samtang pilason naman ang hinablos sini nga si Edilberto Centena kag apo nga si Vick Centena.