ILOILO CITY – Nakit-an sang National Police Commission (Napolcom) nga may probable cause ang mga kaso administratibo batok sa tatlo ka pulis sa Iloilo City, rason agud irekomenda sang ahensiya ang pagpasaka sang kaso.
Sa interview sang Bombo Radyo Iloilo, ginpahayag ni Rommel Sta. Ana, spokesman sang Napolcom Region 6, nga kaso nga grave misconduct ang ipasaka batok kay C/Insp. Aldrin Lamera, hepe sang Police Station No. 1 kag PO3 Miguel Hansilan, samtang conduct unbecoming naman para kay PO3 Wilfredo Tagle.
Ang kaso ni Lamera ang may kaangtanan sa pagwasay sini sang crime statistics room sang Police Station 1 matapos maabtan nga wala sang naka-duty nga pulis.
Si PO3 Hansilan naman ang ginreklamo sang pagpangmolestiya sa isa ka preso sa Mandurriao.
Ang kaso naman batok kay PO3 Wilfredo Tagle ang may kaangtanan sa ginaalegar pagpanag-iya sang nasambit nga pulis sang drug kag prostitution den sa North Baluarte, Molo, Iloilo City.
Sa karon suno kay Sta. Ana, magapabilin anay sa puwesto ang nasambit nga mga pulis tubtob nga wala pa sang desisyon sa kaso sang mga ini.