Magaabot sa Pilipinas sa masunod nga bulan ang mga pinuno sang foreign affairs kag defense departments sang Japan para sa isa ka high-level meeting kun sa diin mahimo man pirmahan ang isa ka defense pact.
Paagi sa Reciprocal Access Agreement, mapahanugutan ang Pilipinas kag Japan nga makapadala sang pwersa-militar sa kada teritoryo sang duha ka nasyon para sa nagkalain-lain nga rason lakip na ang pagpabilin sang kalinong sa West Philippine Sea.
Una na nga ginlaragway ni President Ferdinand Marcos, Jr. nga “tuman ka importante” ang amo nga agreement nga pirmahan na subong nga tuig.
Ginkumpirma naman sang Department of Foreign Affairs (DFA) nga Hulyo 8 ang petsa sang pag-abot nanday Japanese Foreign Minister Kamikawa Yoko kag Defense Minister Kihara Minoru sa Manila.
Magapakigkita sila kanday Foreign Affairs Secretary Enrique Manalo kag Defense Secretary Gilbert Teodoro Jr. para sa 2nd Philippines-Japan Foreign and Defense Ministerial Meeting (“2+2”).
Suno sa ahensya, lakip sa istoryahan sang apat ka ministro amo ang bilateral kag defense kag security issues nga nagaapekto sa rehiyon kag magabayluhanay man sang opinyon sa nanuhay-tuhay nga regional kag international issues. Sa amo nga official visit, magapatigayon man sanday Manalo kag Teodoro sang separado nila nga bilateral meetings sa ila counterparts agud nga maistoryahan ang dugang nga mga concerns.
Maga-upod man ang senior Japanese lawmakers lakip si Japanese House of Representatives member Wada Yoshiaki agud nga maistoryahan kun ano pa ang mahimo sang Japan kag Pilipinas sa problema sa West Philippine Sea.
Suno pa sa DFA, ang 2+2 Foreign and Defense Ministers Meeting amo ang pinakamataas nga consultative mechanism sa tunga sang Pilipinas kag Japan. Isa ini ka plataporma nga magapabaskog sang dinekada na nga Strategic Partnership sa tunga sang duha ka nasyon.
Matandaan nga sang nagbisita si Japanese Prime Minister Fumio Kishida sa Pilipinas, nagsiling ini nga gina-ugyunan sini si President Marcos nga umpisahan na ang negosasyon sa reciprocal access agreement para mapasugtan ang militar sang Japan kag Pilipinas nga magpatigayon sang joint military exercises kag mapapag-on pa ang defense cooperation.
