STA. BARBARA, ILOILO – Gin-ako sang katapo sang Philippine Army nga siya ang nagluthang-patay sa isa ka myembro sang Bureau of Jail Management and Penology (BJMP) Region VI sa Bangga Dama, Brgy. Bolong Oeste, Sta. Barbara, Iloilo.
Ang biktima amo si Jail Senior Inspector Andrew Larupay, 51, jail warden nga assigned sa La Carlota City Jail sa Negros Occidental kag residente sang Barangay Caninguan, Lambunao, Iloilo.
Tatlo ang ginapahayag suspek kasunod sang ginapahayag nga road rage apang ang una nga nadakpan amo si Private First Class Bjourn Kirby Esposo, 26, assigned sa 12th Infantry Battalion sang Philippine Army sa Calinog, Iloilo kag residente sang Barangay Malitbog Ilaya, Bingawan, Iloilo.
Matapos sini, nagsungka man ang duha ka kaupod sang suspek nga sanday Staff Sergeant Nelson Sorilla Jr., 40, residente sang Barangay Binangkilan, Santa Barbara, Iloilo kag Nilo Silao alias Tata, 47, residente sang Magsaysay St., Calinog, Iloilo kag miyembro sang Citizen Armed Force Geographical Unit (CAFGU).
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga madasig nga nadakpan si Esposo sa dalan Arroyo malapit sa public market sa amo nga banwa bangud nagasala-sala ini samtang nagalakat sa dalan, wala sang tsinelas, kag nagasuksok sang panapton nga nagasanto sa description sang mga nakasaksi sa shooting incident.
Nakuha sa suspek ang .45 caliber pistol nga amo ang gingamit sa pagluthang sa biktima.
Suno kay Celoso, ginpahayag sang suspek nga nagpalupok siya sang armas-luthang bangud gin-unahan man siya ‘hampak’ sang biktima sa iya ulo gamit ang iya man nga armas-luthang.
Ginapahayag nga lima ang igu sang bala nga naangkon sang biktima apang gin-alegar sang suspek nga siya lang ang nagluthang sa biktima kag wala na sang kahilabtanan ang duha ka iban pa niya nga kaupod.
Ginpahayag man sang hepe nga iya sang 9mm pistol kag .45 caliber pistol ang mga bala nga nakit-an sa lugar kun sa diin natabo ang shooting incident apang ginatumod pa sang mga pulis kun sin-o ang nagauyat sang 9 mm pistol.
Ginsaysay man sang suspek sa mga pulis kun ano paano natabo ang road rage nga amo ang ginatudlo rason kun ngaa natabo ang shooting incident.
Santo sa alegasyon ni Esposo, padulong siya sa syudad sang Iloilo sakay sa elf truck nga isa ka government vehicle.
Samtang yara sa national road sa Cabatuan, nagbusina ang kotse nga ginamaneho sang biktima amo nga naghatag sang ligwa si Esposo agud nga maka-overtake ang kotse sang biktima, kag pag-abot sa unahan, nagbusina man si Esposo kag ginapahayag nga nag-umpisa na ang sunod-sunod nga businahay tubtob sa Bangga Dama sa Sta. Barbara, Iloilo.
Gin-alegar man sang suspek nga samtang yara pa lang sa dalan, nagpakita na si Larupay sang iya nga pusil.
Ginapahayag nga una nga nakaabot sa Bangga Dama si Larupay kag may kumprontahanay pa nga natabo kag santo liwat sa alegasyon sang suspek, ginpakdol siya sang biktima sa ulo.
Suno kay Police Major Celoso, gin-alegar sang suspek nga gin-unahan lang niya palupok ang biktima.
Natumba ang biktima nga si Larupay sa kilid mismo sang elf truck samtang ginauyatan ang BJMP-issued firearm.
Padayon man ang imbestigasyon sang otoridad may kaangtanan sa insidente.
