ILOILO CITY – Nagpanawagan ang isa ka katapo sang Veterans Federation of the Philippines sa mga kabataan nga kinahanglan nga magsakripisyo para sa pungsod.
Sa interview sang Bombo Radyo kay Colonel Guillermo Matiling, Jr., isa ka retirado nga katapo sang Philippine Army, iya ginpahayag nga indi man kinahanglan sang mga kabataan nga magsulod sa Armed Forces of the Philippines.
Kinahanglan lang nila nga mangin isa ka maayo nga Pilipino suno kay Matiling.
Lakip diri ang pagsunod sa mga layi kag ang indi pag-upod sa mga kumunista nga grupo.
Ginpahayag man ni Matiling nga kinahanglan nga i-selebrar ang Araw ng Kagitingan bilang pagkilala sa sakripisyo sang mga nauna nga soldado.
Importante suno sa iya ang papel sang mga soldado bangud sila ang nagapabilin sang kalinong kag nagahatag sang proteksiyon sa teritoryo sang pungsod.
