Patigayunon sa liwat subong nga adlaw, Disyembre 23 ang Dugong Bombo sa Passi City Arena.
Kaupod sang nasambit nga aktibidad ang Bombo Radyo Iloilo kag Western Visayas Medical Center (WVMC).
Sa interview sang Bombo Radyo kay Passi City Mayor Stephen Palmares, iya ginpahayag nga nagapasalamat siya sa mga grupo kag empleyado nga nagpabutyag sang intensyon nga magdonar sang dugo.
Suno kay Palmares, ini na ang pinakaulihi nga Dugong Bombo nga patigayunon sa syudad sa subong nga tuig.
Pahayag sang alkalde nga nagatinguha gid ang syudad sa pagtipon sang dugo agud masiguro nga may suplay para sa tanan nga nagakinahanglan nga Passinhon ano man nga oras.
Nagpasalig man ang natungdan nga sa masunod nga tuig magapadayon sa gihapon sang mga bloodletting activity ang syudad sang Passi kada bulan.
Samtang, magaupod man sa pinakauna nga kahigayunan ang LGBTQ (lesbian, gay, bisexual, transgender and queer) community sa Passi City sa nasambit nga bloodletting activity.
Sa interview sang Bombo Radyo kay Randy Palencia, pinuno sang LGBTQ sa syudad sang Passi, iya ginpahayag nga luyag man sang ila komunidad nga makigbahin agud makabulig man sa pumuluyo.
Suno kay Palencia, katuyuan man sang ila pakigbahin nga ma-engganyo ang ila mga myembro nga naga-exist man sila.
Nagpang-imbitar man ang natungdan sa LGBTQ community sa Passi City nga magdonar man sang dugo.
