Ginabati-bati nga malapit na lang nga ma-settle ang problema sa tunga nanday Princess of Wales nga si Kate Middleton kag sang Duchess of Sussex nga si Meghan Markle.
Sa reports, ginapahayag nga makigkita si Kate kay Meghan sa ila pagbisita ni Prince William sa Estados Unidos sa Disyembre subong nga tuig.
Sa amo nga bulan, magatambong si Kate kag William sa ikaduha nga annual Earth shot Prize awards ceremony sa Boston nga kadungan man sang byahe nanday Prince Harry kag Meghan para sa Ripple of Hope Award Gala sang Robert F. Kennedy Human Rights organization sa New York.
Ginapahayag nga amo man ini ang mangin daku nga tikang antes mag-ayo liwat ang relasyon sa tunga sang mag-utod nga sanday Prince Harry kag Prince William.
Una na nga ginpahayag nga may daku nga argumento sa tunga nanday Meghan kag Kate antes ang kasal nanday Harry kag Meghan sang 2018.
Nag-kumplikado pa ang ila relasyon kasunod sang desisyon nanday Harry kag Meghan nga magpalayo na sa British Royal Family sang 2020. ##
