ILOILO – Halos katunga sang mga miyembro sang rebelde nga grupo ang ginabug-usan sang mga minor de edad ukon pamatan-on.
Ini ang nagaguwa sa monitoring sang Philippine Army may kaangtanan sa recruitment sang New People’s Army, indi lamang sa probinsya sang Iloilo kundi lakip na sa bug-os nga pungsod.
Sa interview sang Bombo Radyo kay Lt. Col. Joel Benedict Batara, commander sang 61st Infantry Battalion sang Philippine Army, iya ginpahayag nga 50% tubtub 60% sa mga nagabug-os sa New People’s Army ang ginalakipan sang minor de edad.
Suno kay Batara, indi man mahinago nga may yara sang recruitment sang rebele nga grupo sa nanari-sari nga sektor ilabi na sa mga estudyante.
Ginhalimbawa ni Batara ang nagakatabo sa mga eskwelahan nga ginapaguwa lang nga nagasentro sa youth activism ang mga school organization agud nga indi gilayon nga indi mahibalu-an nga ginagamit sang rebelde nga grupo.
Nagapati man ang natungdan nga propaganda lang ukon nagapakuno-kuno lang ang rebelde nga grupo nga mabaskog agud nga indi mahuy-an.
Sa subong nga wala na ang peace negotiations, padayon ang kampanya sang Philippine Army agud nga matapna ang terorismo sa pungsod.
Samtang, may kaangtanan diri, madamu na ang mga rebelde nga nagbalik na sa sabak sang gobyerno.
Suno kay Batara, linibo na ang mga former rebel nga nagdesisyon nga bayaan na ang malain nga buluhaton kabaylo sang malinong nga pagpangabuhi.
May kaangtanan diri, may yara sang ginahatag nga cash kag livelihood assistance ang gobyerno sa idalom sang Enhanced Comprehensive Local Integration Program agud nga indi na magbalik sa New People’s Army ang mga anay rebelde.
