Kaufman, namangkot sa prosecution kun imbestigaran man ang pagpamatay sa idalom sang Marcos admin

Ginpamangkot sang lead defense counsel nga si Atty. Nicholas Kaufman ang prosekusyon sa International Criminal Court (ICC) kun imbestigaran man bala si President Ferdinand “Bongbong” Marcos, Jr.

Ini bangud base sa presentasyon ni Kaufman, nagpadayon ang mga pagpamatay sang state forces bisan nga natapos na ang termino ni former President Rodrigo Duterte kag gindala na ini sa The Hague.

Kabahin ini sang ginmuno ni Kaufman sa ikatatlo nga adlaw sang confirmation of charges hearing batok kay Duterte nga nagapangatubang sang three counts of crimes against humanity bangud sa iya drug war.

Gingamit ni Kaufman sa iya nga presentasyon ang pagtuon halin sa University of the Philippines nga naangot sa drug-related killings sa idalom sang administrasyon ni Marcos.

Ang hearing sa ICC naga-cover lamang sa hurisdiksyon sang korte halin sang November 1, 2011 tubtub March 16, 2019. Apang ang gingamit nga report ni Kaufman nagasiling nga sa 342 killings sang 2022, may yara sang 162 nga ginkomiter sang state agents sa idalom na sang una nga tuig ni Marcos sa pwesto.

Ini nga numero nagsaka sang 2024 suno pa kay Kaufman.

“The conclusion is that there is no reason to believe that Duterte’s disappearance from the political scene would have frustrated the ongoing incidents of murder at the hands of state agents or vigilantes,” suno sa abogado ni Duterte.

Diri na kag nagpamangkot si Kaufman kun may yara man bala sang naga-imbestigar sini halin sa ICC prosecution.

“Clearly, I’m forced to ask myself whether anyone on the other side of this room has thought of investigating the Marcos regime and the related phenomenon and holding someone accountable,” suno pa sa iya.

Ginkwestyon man sini ang prosekusyon kun ngaa wala na sang nagapanawagan sang “accountability” sa mga napatay sa Marcos administration. “Or is it of no consequence now that Mr. Duterte is sitting in the ICC detention center?” pamangkot sini.

Ini ang katapusan nga bahin sang presentasyon ni Kaufman antes nagtakop ang Session 2 sa Day 3 sang confirmation hearing para sa 90-minute break sang Pre-Trial Chamber I.#