ILOILO CITY – Mas maayo nga mangin specific ang kaundan sang Anti-Terrorism Act of 2020 agud nga wala sang misinterpretation nga matabo.
Ini matapos nga ginpirmahan na ni Presidente Rodrigo Duterte ang Anti-Terror Bill nga may katuyu-an sa pagtapna sang terorismo sa pungsod.
Sa pagpaathag sang legal expert nga si Atty. Leo Superio, may yara sang bentaha kag disbentaha sa pagpatuman sang Anti-Terrorism Act to 2020.
Suno kay Atty. Superio, kun may yara sang pagwaslik-poder nga matabo, mahimo nga mapaanggid sa Martial Law ang matabo sa Pilipinas kun sa diin mahimo nga dakpon kag mapreso sang tubtub sa 24 ka adlaw ang isa ka tawo apisar nga wala sang warrant of arrest.
Ginpahayag ni Atty. Superio nga tuman ka lapad ang sakop sang tinaga nga terorismo rason nga dapat nga mangin specific ang kaundan sang layi kun paano makabig nga terorista ang isa ka tawo.
Ang pagpahayag sang pagkadismaya ukon pagpakamalaot sa gobyerno suno sa natungdan ang wala nagakahulugan sang akto sang terorismo kundi ini ang isa lamang sa mga kinamatarong sang mga Filipino.
Sa subong, balantayan kun bala may yara sang magpalab-ot sang reklamo sa Korte Suprema tuhoy sa Anti-Terrorism Act to 2020.
