ILOILO CITY — Dakop ang isa ka kawatan sa ginpatigayon nga drug buy-bust operation sang Iloilo City Police Station 1 sa Barangay Gloria, City Proper, Iloilo City.
Ang suspek amo si Joel Tiangson, alyas “Bad Boy”, 31, kag residente sang Brgy. Rizal Pala-Pala I, Iloilo City Proper.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga gamit ang ₱6,000 nga buy-bust money, nabaklan ang subject sang isa ka plastic sachet sang suspected shabu.
Suno kay Gimeno, narekober man sa paghinakop sang subject ang 12 ka plastic sachets sang suspected shabu kag iban pa nga mga non-drug paraphernalia.
Ginpahayag man ni Gimeno nga ginareklamo ang subject sang iya mga himata kag pamilya bangud sa pagpangawat sini sang gamit kag ginabaligya.
Dugang pa sang hepe, nga kapin isa ka bulan nga ginamonitor ang subject sa diin matapos ini madakop, nakuhaan sang 25 grams nga suspected shabu nga may estimated market value nga ₱170,000.
Sa karon nagapangatubang ang suspek sa kaso nga theft kag paglapas sa Republic Act 9165 ukon Comprehensive Dangerous Drugs Act of 2002.
